TACLOBAN CITY – Personal nga gin bisita ni President Ferdinand Marcos Jr. an Eastern Visayas Medical Center agud panginano-on an sitwasyon han Zero Balance Billing Program ha rehiyon agud masiguro nga waray na kadugangan nga babayaran an mga pasyente mintras an nga ini in nagpapaupay ha hospital.
Kumo usa nga kaparte han panuyuan han administrasyon nga maihatag an abot-kaya ngan dekalidad nga serbisyo medikal, in mahugot nga igin patuman ha EVMC an No Balance Billing policy para ha mga pasyente nga aada ha basic accommodation.
Kun diin, ha mao nga pag bisita han presidente in nakahimalad hini an usa nga benepisyaryo han Zero Balance Billing kun diin, tikang ha kabug-osan nga 406, 973 pesos nga baraydan han pamilya in humabubo ini ha 372, 561 pesos mahitungod ha gin iban han PhilHealth nga 32,000 sugad man an nahahabilin nga 372, 561 pesos in gin shoulder naman han gobyerno pinaagi han zero balance billing.
Kaupod ha paglilibot han presidente ha bug-os nga area han ward in hi DOH Secretary Teodoro Herbosa agud makipaghimangraw ha mga opisyal han mao nga hospital, mga medical frontliners, sugad man an pira nga mga pasyente agud personal nga mahibaruan an sitwasyon han “Bayad na Bill Mo” program.
An mao nga pag bisita han presidente ha EVMC in an kaunaunahan nga pag bisita hini ha DOH hospital ha bug-os nga nasud tikang han gin hingadayan ini nga zero balance billing han nakalabay nga State of the Nation Address dida han bulan han Hulyo.
Kumo pinakadako nga ospital ha Eastern Visayas, an DOH EVMC in usa nga Level 3 tertiary hospital nga mayda 1100 bed capacity, ngan may kapasidad nga makapaghatag hin critical health services ha mga pasyente ha bug-os nga rehiyon ngan ha mga kahigrani nga lugar. |(via Bombo Niña Magpili)
