WASHINGTON D.C., USA – Ginlalauman nga magpapadara an Pentagon hin kadugangan nga yinukot-yukot nga sundalo tikang ha elite 82nd Airborne Division pakadto ha Middle East, sumala ha mga notisya, samtang padayon an kasamok ha butnga han Estados Unidos ngan Iran.
Sumala ha mga source, aada ha 3,000 kutob 4,000 an posible i-deploy agud pakusgon an presensya han Amerika ha rehiyon, bisan padayon nga ginmalatumat ni US President Donald Trump nga abri hiya ha negosasyon ha Iran para ha ceasefire.
Dire pa klaro kun diin iksakto nga igpapadara an mga tropa han US, pero sumala ha notisya panuyuan hini pahalawigon an akos han Amerika para ha posible nga operasyon.
Ha pagkayana, in maabot ha 50,000 na an mga tropa han Amerikano an aada ha Middle East kaupod na an mga ginpadara pala nga Marines ngan war ship sugad han USS Boxer.
Samtang, nagpapabilin naman nga ayat ha administrasyon ni Trump an hamubo nga suporta han publiko ha kampanya kontra ha Iran, sumala ha usa nga survey kun diin mas damo an dire abuyon kaysa ha nasuporta ha aksyon militar han Amerika.
