Nangaro hin bulig an mga otoridad ha Ceuta ha gobyerno han Spain mahuman an pagdaramo han yinukot-yukot nga migrants ha gudti nga Spanish territory nga aadto ha norte nga dapit han Africa.
Mababaruan nga ginhangyo ha Madrid nga magdeklara na hin national emergency nga magpadara hin mga sundalo agud mapakusog an seguridad ha border.
Ha mga kuha nga video ha Tarajal Beach, makikit-an an ginatos-gatos nga migrants nga kadam-an in mga Moroccan, an natabok ha breakwater ngan nadalagan ha baybayon ngan mga karsada agud makasulod ha teritoryo han Spain.
Kadam-an ha mga karuyag kumadto ha Spain in mga kabataan nga lalaki, kababayen-an, ngan kabataan nga kaupod an ira mga pamilya.
Sumala kan Ceuta regional government head Juan Jesús Vivas, kinahanglan hin kadugangannga pwersa hin pulisya ngan militar agud mapabilin an seguridad han nasud.
Syahan na gihapon nga ginpahayag ni Vivas nga naghuhuruot an mga migrants ha reception centers ha Ceuta, kun diin ginatos-gatos ha mga ini an an napipirita nga kumaturog ha mga karsada.
Utro nga dumuro an tensyon ha border han Spain ngan Morocco kasunod han pagdamo han mga migrante nga nagprubar makasulod ha Ceuta, kaupod an mga naglalangoy agud makasulod la ha Spain.
Manunumduman nga dida han 2021, sobra 8,000 nga migrants an nakasulod ha Ceuta ha sulod la han duha kaadlaw nga usa ha pinakadako nga border crises ha butngan han Spain ngan Morocco.
