INTERNATIONAL NEWS– Gin-anunsyo hiton head han World Health Organization (WHO) nga hi Tedros Adhanom Ghebreyesus nga iibanan hin haros katunga an ira executive management team ha butnga han kasamok ha pondo durot han pagsuspender hiton Estados Unidos nga pondohan an nasabi nga ahensya.
Tikang ha 11 nga opisyal, 6 nala an magbubug-os hin bag-o nga headquarters han WHO ha Geneva tinikangan hiton Hunyo 16.
Kalakip ha mga tatangalon hira Mike Ryan, director han emergency response, ngan Bruce Aylward, head han universal health coverage program ngan mga pangunahon nga tinaglawas han WHO kontra COVID-19.
Dugang pa ni Tedros, dako an nagin utang nga kaburot-on han organisasyon kan Ryan matungod ha iya nagin importante nga papel ha panahon han pandemya.
Magpapabilin naman ha bag-o nga team hi Jeremy Farrar bilang assistant director-general ha health promotion, mababruan nga an iya anay posisyon kumo chief scientist in igbabalhin naman kan Dr. Sylvie Briand han France.
Ginpaangbit naman hi Tedros nga han nakalabay nga Abril naatubang na an WHO ha kakulangan hiton pagpapasweldo ngan umabot ine ha $560 million – $650 million para tuig 2026-2027.
Ha kaluyo hine, waray la gihapon magbayad han 2024 contributions an U.S. ngan dire na gihapon nira ginlalauman nga magbabayad yana nga tuig 2025.
