NATIONAL NEWS -Opisyal nga gin-endorso ni Vice President Sara Duterte hi Senator Imee Marcos para ha iya utro nga pagdalagan pagka-Senador ha 2025 midterm elections.
Ha ginpagawas nga 31 second nga video han Senadora ha iya Facebook page, gin- indorso hiya hiton Bise Presidente ngan parehas an mga ine nakasul-ot hin kolor itom, kumo pagrepresenta hiton Ka-gutom ngan krimen.
An pag-endorso han Bise Presidente kan Sen. Imee in pira kasemana mahuman, nga bumulag an Presidential sister tikang ha iya senatorial slate han administrasyon hadton Marso 26 ngan bumalik ha pagigin independent candidate.
Una hine, ginklaro ni Sen. Imee nga nagpapabilin la gihapon hiya nga independent candidate ha kaluyo han iya pag-upod ha nagin kampanya han Alyansa han administrasyon.
Nag-ugat ine han paglakat hiton Senadora ha Senate slate han administrasyon han waray tawaga han iya bugto nga hi Pangulong Ferdinand Marcos Jr. an iya ngaran ha pangangampanya nira ha Cavite hadton Marso 21, tungod nga posible nga nag-isog an presidente ha iya mahuman nga pangunahan an imbestigasyon han Senado nga daw ilegal nga pag-aresto han International Criminal Court (ICC) kan anay Pangulong Rodrigo Duterte.
