METRO MANILA – Mahugot nga babantayan han Bureau of Immigration an mga airport ngan port kontra ha mga aktibidad han human trafficking kaupod han ginlalauman nga pagdamo han mga pasaheros ha Semana Santa.
Sumala kan BI Deputy spokesperson Melvin Mabulac, ha sugad nga panahon mayda gihapon nagpruprubar hin human trafficking.
Ini an rason han pagbug-os han Immigration Protection and Board Enforcement Section o I-PROBES han BI para mahugot nga bantayan an mga Pilipino nga nabiyahe pagawas han nasud.
Sugadman, parte an bureau han Inter-agency Council Against Trafficking nga ginmamandohan imbestigaran an mga kaso han human trafficking.
Samtang, kaupod han ginlalauman nga pagdamo han mga pasaheros ha Holy Week, gindidire han bureau an pag-leave han ira personnel ha mao nga period.
