NATIONAL–Nagserbe hi Senador Francis Pangilinan hin balaudnon nga magtitindog hin ginpahaluag nga voucher program para ha mga estudyante ha mga pribado nga skwelahan tikang ha low-income ngan middle-income households.
Ha ilarom han Senate Bill No. 1841, o an “Private Education Voucher Expansions (PEVE) Act” tumong nga igpahaluag an sakop han bulig pinansyal para ha mga underprivileged nga estudaynte tikang ha kindergarten kutob senior high school nga napipiritan nga sumulod ha pribado nag skwelahan mahitungod ha kakulangan ha mga higrani nga pampubliko nga skwelahan.
Nakailarom gihapon ha balaudnon an pag-amyenda o pagbasura ha pira ka probidsyon han Republic Act. No. 8545 o an Expanded Government Assistance to Students in Private Education Act.
Samtang, nakabutang ha explanatory note han balaudnon nga makakakarawat hin voucher assistance an mga estudyante tikang ha middle-income familie–basar ha klasipikasyon han Philippine Statistics Authority (PSA)–nga nagtikang ha mga pampubliko nga skwelahan nag gintudlok han Department of Education (DepEd) kumo congested, o an mga nangungukoy ha mga lugar nga waray harani nga pampubliko nga skwelahan ngan naruruyag nga mag-enroll ha pribado nga skwelahan.
Samtang, nakasaad gihapon ha balaudnon nga an bulig ha mga pribado nga skwelahan nga mapartisipar ha programa in igbabasar ha quality assurance standards, pati na an kahaluag han geographic coverage ngan kadam-an han mga estudyante nga mag-eenroll.
Mababaruan nga nanguna na nga naglunsar an DepEd hin classroom leasing initiative kumo temporaryo nga solusyon ha overcrowding ha mga pampubliko nga skwelahan samtang ginbubuhat an konstruksyon han mga permanente nga classrooms.
