TACLOBAN CITY– Naghatag hin pagklaro an Department of Education (DepEd) Leyte Division, kasumpay ha nagsarang nga video han mga estudyante nga nag-aaway ha sulod han school premises hiton Daniel Z. Romualdez Memorial Elementary School, Tolosa Leyte.
Sumala kan, DepEd Leyte Division, Information Officer Karen Barril, nga dayon nira ginpanginano kun anu an rason han pag-aragway han mga estudyante.
Dugang pa hine, an mga adviser han kabataan nga dabi han kasamok, in naghimo dayon hin pitad agud nga magin mahimyang an sitwasyon.
Ginsigurado naman ni Barril, nga na-ayos naman dayon an kasamok ha mao nga adlaw.
Ginpaangbit pa hine, nga urhi na kaduro an nagsarang nga video, matungod nga maresolba na an problema, ugsa nga ig-upload an video han mga estudyante nga nag-viral online.
Ginkahimangraw gihapon han mga magturotdo an mga kag-anak han nasabi nga mga estudyante, ngan parehos an mga ine nag-aro hin pasaylo ha mata-usa.
Ha pagkayana, nagdudumara an nasabi nga eskwelahan hin counseling ha mga estudyante nga dabi han nasabi nga kasamok.
