Magdo-donar an Villar Group of Companies hin unom nga lote nga kinahanglan para ha right-of-way han Light Rail Transit Line 1 (LRT-1) Cavite Extension mahuman makigsabot ha Department of Transportation (DOTr).
Subay ha DOTr, nakasabot an duha nga parte ha tulo nga kondisyon para ha donasyon han tuna: an paghahatag hin unconditional permit to enter, waiver of subrogation kontra ha gobyerno, ngan pagkansela han mortgage ha mga tuna nga igdo-donar.
Nabug-os an kasabutan ha pagharampang kaupod hira Transportation Secretary Banoy Lopez, ngan mga tinaglawas han Villar Group dida han Biyernes, Agosto 7.
Dida han nakalabay nga bulan, gin manduhan ni Presidente Ferdinand Marcos Jr. an DOTr nga resolbahon an mga isyu ha right-of-way nga nakakadelatar ha pagpapahilawig han LRT-1 kutob Cavite.
Target naman han Light Rail Transit Authority (LRTA) nga makompleto an bug-os nga LRT-1 Cavite Extension ugsa mahuman an termino han administrasyon Marcos ha 2028.
Ha presente, ginagamit na han publiko an Phase 1 han proyeko nga nagdudugtong ha Baclaran Station ngan Dr. Santos station pinaagi han lima nga bag-o nga estasyon.
Samtang, nakatalaan naman pagtukuron an mga estasyon ha Las Piñas, Zapote, ngan Niog.
Subay ha Villar Group, ginlalauman nga mapipirmahan yana nga bulan an Memorandum of Agreement, Right-of-Way Acquisition Agreement, ngan Deed of Donation agud makagtikang an konstruksyon ha masunod nga tuig.
An LRT-1 Cavite Extension in nagkakantidad hin P64.9 bilyon nga proyekto nga ginpopondohan han nasyunal nga gobyerno, Japan International Cooperation Agency (JICA), ngan Light Rail Manila Corporation (LRMC).
Kun mahuman na, madudugngan hin 11.7 kilometro an presente nga linak han LRT-1, tikang ha 20.7 kilometro tikadto ha 32.4 kilometro, agud mapahusay an serbisyo han mga pasaheros ha Metro Manila ngan Cavite.
