TACLOBAN CITY – Abrido na an Veterans Ward han Eastern Visayas Medical Center ngan nagtikang na gihapon ini kumarawat hin mga pasyente.
An veterans ward in igin donar han Philippine Veterans Affairs Office ha nasabi nga hospital mahitungod nga karuyag han nasabi nga ahensya nga magkamay-ada hin pasilidad para ha mga meyembro han Philippine Veterans Affairs Office.
Gin ngaranan an nasabi nga ward subay ha usa nga guerilla nga nag tikang ha Sinirangan Bisayas nga hi Captain Nieves Fernandez.
Panuyuan han ward nga makag-hatag hin maupay nga pag-atiman ha mga panginahanglan-panlawas ngan pag tambal han mga beterano.
Sumala kan EVMC Spokesperson, Atty Roby Peñalosa, an pag abri han Veterans Ward in usa nga pag hatag hin pagkilala ngan pagtahod ha mga serbisyo nga igin hatag han mga beterano nga mga sundalo para ha katalwasan ngan kamurayawan han nasud.
An nasabi nga wards in may ada 15 nga mga higdaan nga eksklusibo la nga magagamit han mga beterano han World War 2, Korean War, Anti-Dissident Campaigns veterans, ngan mga Armed Forces of the Philippines veterans nga retirees kaupod an ira mga qualified dependents—below 18 years old nga anak ngan asawa han beterano.
Nalalain naman an ward han mga beterano tikang ha general nga ward han nasabi nga hospital, kun diin libre nga matatagamtaman ha nasabi nga ward an ngatanan nga mga serbisyo, ngan abilable gihapon an tanan nga serbisyo ha veterans ward labot la han infectious diseases.
Kinahanglan nga mayda referral tikang ha Philippine Veterans Affairs Office para mahi-admit ha nasabi nga ward mahitungod nga eksklusibo la ine para ha mga beterano ngan qualified dependents hine.
An Veterans Ward ha EVMC in an ika-lima nga pasilidad nga naghahatag hin serbisyo-mediko ha mga beterano ngan AFP retirees nga gin abrihan han Department of Health retained hospital ha bug-os nga nasud. (via Bombo Niña Magpili)
