TACLOBAN CITY — Patay an usa nga miyembro han New People’s Army (NPA) mahuman magka-engkwentro an grupo han mga kasundaluhan ngan gintutuohan mga NPA ha Brgy. Deit de Turag, Silvino Lobos, Northern Samar.
Ginkilala an namatay kan Nonoy Olanggo, 28 anyos, miyembro han Front Committee 1, Sub Regional Committee “Emporium” han Eastern Visayas Regional Party ngan nag-uukoy la mismo ha nasabi nga Baranggay.
Sumala kan Cpt. Ryan Layug, spokesperson han Division Public Affairs Office han 8th Infantry Division, humagos ha 20 minutos an balyuay hin buto ha butnga han walhon nga grupo ngan mga kasundaluhan kun diin nakaiskapo an mga rebelde ha magkalain-lain nga direksyon han mao nga lugar.
Narekober ha mao nga area an patay nga lawas han gintutuohan rebelde kalakip na an dara hini nga M16 riffle, usa nga magazine nga loaded hin 10 live rounds hin bala.
Nagtutuo naman an mga kasundalohan nga mayda mga samaran ha walhon nga grupo matungod nga mayda hira nakit-an nga mga dugo ha area kun diin umiskapo an nasabi nga rebelde nga grupo.
Mapasinalamaton naman hira ha ngatanan nga mga residente ha padayon nga paghahatag hin mga impormasyon bahin ha presensiya han mga armado nga grupo sugadman mga miyembro han New People’s Army (NPA).
