TACLOBAN CITY – Kalakip ha mga nagradwar an usa nga waraynon ha Philippine Military Academy (BAGSIK DIWA) Class of 2022 ha Fort General Gregorio H. del Pilar ha Baguio City kakulop nga adlaw, Marso 15, 2022.
An 23 anyos nga hi Cadet First Class John Rey Medina, in nagtubo ha Brgy. Canino-an, Pastrana Leyte.
Hiya an pinakasuhag ha upat nga magburugto ngan usa naman nga parag-uma an iya amay samtang an iya nanay naman in usa nga housewife.
Sumala kan Cadet First Class John Rey Medina, han PMA (BAGSIK DIWA) Class of 2022, makuri an pagiging kadete matungod kinahanglan mo nga igbalanse an imo oras sugadman kinahanglan mo magpakusog, mag-ayos hin mga gamit ngan mag-aram hin maupay agud nga deri mahireport ha igbaw.
Pag-istorya pa han kadete nga kumuha hiya hin entrance exam han naeskwela pa hiya ha usa nga unibersidad ha siyudad han Tacloban kun diin nakapasar hiya.
Matungod gihapon ha kakurian kun kay ano ginpadayon niya an pagsakob ha mao nga academy kun diin naihahatag daw nga libre an pag-aram.
Ginpili naman ni Cadet First Class Medina an Philippine Army agud makabulig ha pag-ato han insurhensiya ha bug os nga Pilipinas.
Naghatag gihapon hin mensahe an mao nga kadete ha ngatanan nga karuyag sumulod ha Philippine Military Academy nga maniguro bisan ha kaluyo hiton kakurian matungod makikit-an nimo ha katapusan an maupay nga resulta han imo ginpaningkamotan.
