TACLOBAN CITY – Patay an usa nga sundalo samtang lima samaran ha utro nga pagpapabuto hin gindidire nga Anti Personnel Mines (APM) han mga gintutuohan nga miyembro han New People’s Army (NPA) ha Brgy. Osang han Catubig Northern Samar.
Subay ha impormasyon tikang ha 20th Infantry Battalion han Philippine Army, nagdudumara hin combat patrol an tropa han mga militar ha mao nga lugar kun diin tigda nala bumuto an mao nga mga landmines.
Ha pagkyana, waray pa igpagawas an pangilal-an han namatay nga sundalo samtang gindara naman ha Eastern Visayas Medical Center an mga samaran nga biktima.
Mababaruan nga han nakalabay la nga Hulyo 5, in nagpabuto gihapon an mga NPA hin mga anti-personnel mines ha Brgy. Magsaysay, Mapanas Northern Samar kun diin maabot ha pito an mga nasamaran nga kasundaluhan.
Sumala naman kan Capt. Ryan Layug, tagapagyakan han 8th Infantry Division Philippine Army, mahugot nira nga ginkokondina an padayon nga paggamit han mga NPA han ginpapagbawal nga APM ngan nanawagan gihapon an mga militar ha Commission on Human Rights nga imbestigaran an mao nga pagtalapas han mga NPA ha International Humanitaritian Law.
