TACLOBAN CITY – Nagtutuo an pira nga mga propesor ha pira nga mga unibersidad ha Sinirangan Bisayas nga an ginduduso nga pagkakaada hin kalugaringon comfort room para ha mga miyembro han LGBT community in kaparehos hin paghahatag hin tinuod nga respeto ha magkadurudilain nga gender orientation.
Sumala kan Prof. Sev Blanco II, OIC Director han Gender Development Office han Eastern Visayas State University (EVSU), an pagduso ha pagkaada hin restroom para ha mga LGBT in dire problema kundi usa nga klase hin paghatag hin respeto ha ira.
Ini daw in usa nga plus factor ngan opportunidad para matugunan an mga panginahanglan han mga gender oriented people nga magkaada hira hin place of comfort.
Mahinumduman nga nagtikang an mao nga himangrawon mahuman an insidente nga ginkakadabihan han usa nga transwoman nga ginpagawas ha cr han mga kababayin-an.
