TACLOBAN CITY – Patay nga mahikit-an an usa nga LGBTQ ha Catarman, Northern Samar.
Ginkilala an biktima kan Jaspher Marquez, empleyado han Philippine Red Cross ngan residente han Brgy. Galutan Catarman, Northern Samar.
Sumala kan Plt. Col. Michael Jude Dotingco Chief of Police han Catarman Municipal Police Station, nadiskubre an patay nga lawas han biktima ha may tulay han Diversion Road banda ala-6 han aga han nakalabay nga adlaw kun diin may-ada ine mga buno ha diru-dilain nga parte han lawas.
Basar han imbestigasyon, gumawas daw an mao nga biktima kaupod an iya mga kasangkayan ngan nakig-inuman ine ha Bar ha syudad han Bobon Northern Samar.
Subay han mao nga opisyal, nagyakan daw ine nga haiya mga kasangkayan nga makikigkita ha usa pa niya nga sangkay san-o umuli haira panimalay.
Dugang pa hine, nawawara daw gihapon an wallet nga cellphone ngan iba pa nga mga higamit han biktima.
Ha pagkayana, padayun itun ginbubuhat nga imbestigasyun han mga kapulisan agud mahibaruan an nagin hinungdan han mao nga insidente.
