TACLOBAN CITY – Patay an usa nga job order employee han Leyte Local Government Unit mahuman nga pamusilon han waray pa kakikilal-e nga mga suspek.
Ginkilala an biktima kan Martin Deloso, 32-anyos an pangidaron, usa nga J.O., ngan residente han Brgy. Baco, Leyte, Leyte.
Sumala kan PMSgt. Emerey Souro Ibadolaza lll, Chief investigator hiton Leyte Leyte Municipal Police Station, nakadto ha usa nga balay an biktima ngan may-ada hine kaistorya han tigda ine nga parahan han duha nga suspek nga waray pa pangilal-an ngan pagpamusilon.
Nag-angkon naman ine damu nga igo hin pusil ha magkaduru-dilain nga parte han lawas hine.
Gindara pa ine ha Carigara District Hospital pero gindeklara na ine nga dead-on-arrival hiton attending physician hine.
Nakuha naman ha lugar han insidente an lima kabug-os nga basiyo han pusil nga kaparehas han kanan M16 rifle.
Ha pagkayana in padayon pa naman an gindudumara nga imbestigasyon kasumpay han nasabi nga pamusil agud mahibaruan an pagkakakilal-an han mga suspek.
