TACLOBAN CITY – Nakag angkon hin pagdayaw an usa nga tricycle driver ha lugar han Oras, Eastern Samar mahuman ini nga mag uli ha stasyon han Kapulisan hin cash nga nakantidad hin 17 mil de pesos.
Sumala kan PSS Marlon Mongo han Oras PNP, nga ginkilala an mao nga tricycle driver nga hi Edgar Palines ngan naguukoy han Barangay burak.
Sumala hini nga han makit-an daw han mao nga driver an usa nga bag nga nabilin ha usa nga waiting shed in dagmit ini niya nga gin turn over ha Stasyon han Kapulisan.
Ha pag check nira han bag in didto nakit-an an pira nga mga importante nga dokumento, ID ngan cash nga nagkakantidad hin 17 mil de pesos.
Dayun naman hira nga nagdumara hin aksyon agud nga maiuli an mao nga kwarta nga gintatag-iyahan han usa nga maestra han Oras National Highschool ngan residente han Barangay San Roque, Eastern Samar.
Sumala han tag-iya nga sobra an iya kalipay tungod nga waray masilaw ha kwarta an driver ngan ginbalik hin bug-os an iya nawawara nga kwarta.
Dugang pa han mao nga opisyal, nga ini na daw an ika duha ka beses nga nag uli hin kwarta an mao nga tricycle driver ngan an una in an nahulog nga wallet han iya kakilala.
Damo naman an nagdayaw kan Palines tungod han kamakuri nga kahimtang komo usa nga tricycle driver in waray ini ka temptar hin pag angkon hin kadako nga kantidad hin salapi.
