INTERNATIONAL–Gindepensaran han Estados Unidos ngan Israel an ira ginbuhat nga joint military operations kontra han Iran ha emergency meeting han United Nations Security Council han Sabado (Domingo ha Pilipinas), samtang gintawag naman han Iran nga usa nga “war crime” an pagkamatay han mga sibilyan durot han mga airstrikes.
Ginduon ni US Ambassador to the United Nations Mike Waltz nga maiha na nira ginkikilala han international community an prinsipyo nga dire dapat magkamayada hin nuclear weapon an Iran.
Ginbatikos gihapon ni Waltz an presensya han Iran ha meeting, nga sumala hine in “makes a mockery of this body,” ngan ginduon nga igpapabilin han Amerika an “moral clarity” kun diin nagkukulang an UN, subay kan Waltz.
Samtang, ginmalatumat ni Israeli Ambassador to the UN Danny Danon nga dire padalos-dalos an ira nagin pitad.
Mahugot naman nga ginkokondema ni Iranian ambassador Amir Saeid Iravani an pagkamatay han mga sibilyan, kalakip na sobra 100 ka bata ha Minab School ha Southern Iran, ngan gintawagan ine nga usa nga “war crime.”
Waray nagkomento hi Irvani ha pahayag ni US President Donald Trump kasumpay ha ginaalegar nga pagkamatay ni Supreme Leader Ayatollah Ali Khamenei, nga ginanunsyo san-o nagtikang an meeting.
Ha usa nga joint statement nga ginbasa han ambassador han Bahrain, ginkondema han Gulf states an mga pag-atake han Iran kontra ha ira ngan gintawag ine nga “cowardly.” Kalakip han mga pumirma kay an Saudi Arabia, United Arab Emirates, Kuwait, Oman, Qatar, Bahrain, Syria, at Jordan.
Samtang, nagpahimatngon hi UN Secretary-General Antonio Guterres nga an padayon nga military action ha Middle East in posible nga magdurot hin grabe nga disastro ha mga sibilyan.
