Ig uundang na han gobyerno han Estados Unidos an pagpopondo ha mga programa kontra ha pagsarang han Human Immunodeficiency Virus (HIV) ngan AIDS ha South Africa.
Para ha hibaro han publiko, presente nga mayda walo ka-milyon nga South Africans an nabubuhi hin mayda HIV, an pinakahitaas nga ihap diin man nga nasud ha bug-os nga kalibutan.
Iginkokonekta naman han US State Department an nasabi nga desisyon ha kapakyas han South Africa nga proteheran an white-minority Afrikaner community, usa nga akusasyon nga pauru-utro naman nga igindidiwara han gobyerno han nasabi nga nasud.
Subay ha US, panuyo han nasabi nga pitad nga igduso an self-reliance han South Africa ngan ibanan an pagdepende hini ha pondo han Amerika. Dugang pa han US, an South Africa in usa na nga middle-income country nga mayda suprisyente nga kapas agud suportahan an kalugaringon hini nga mga programa ha panlawas.
Kutob hadton 2025, ginsusuportahan han US an mga inisyatiba han South Africa pinaagi han President’s Emergency Plan for AIDS Relief (PEPFAR) nga mayda ginbabana-bana nga pondo nga $400 million kada tuig. Pero, mahuman nga lumingkod utro hi Donald Trump kumo Presidente, nagpagawas ini hin usa nga executive order.
Gin akusahan hini an mga patakaran han South Africa nga nagruruba ha patas nga oportunidad, nagpapaduro han karasahan kontra ha mga tag-iya han tuna, ngan nagpapatuman hin iba pa nga imoral nga polisiya, sanglit tibway na nga ginbalabgan han US an paghahatag hin kadugangan nga bulig.
