TOP STORY – Ginlalauman nga magigin “very interesting” an paghisgot han House Prosecution ha alegasyon han unexplained wealth kontra kan Vice President Sara Duterte, mahitungod ha kadamo han documentary evidence nga igsasalawad kontra ha iya ngan ha iya asawa nga hi Atty. Manases “Mans” Carpio.
Sumala kan impeachment team adviser ngan spokesperson Ace Barbers, dako nga parte han ebidensya ha Article II in mga dokumento nga may paghisumpay ha karikohan ngan mga financial record han mag-asawa.
Ginmalatumat ni Barbers nga dapat bantayan han publiko an pagsalawad han prosecution, mahitungod nga importante nga magin transparent ngan accountable an mga opisyal han gobyerno, labi na ha mga kumpanya nga konektado ha ira.
Dida han nakalabay nga semana, nakakarawat an prosecution hin mga rekord tikang ha mga bangko ngan Bureau of Internal Revenue nga may koneksyon kanda Duterte, Carpio ngan mga kumpanya nga konektado ha ira.
Pangingitaon an mga ini kadungan han ira tax records, Statement of Assets, Liabilities, and Net Worth, ngan mga rekord tikang ha Anti-Money Laundering Council.
