-- Advertisements --

NORTHERN SAMAR – Ugsa pa man mahimo an SPCR project 1 nga proyekto han SIMORA-PALAPAG road in syahan na nga gin talinguha han barangay, munisipyo ngan provincial government han Northern Samar nga magkamay-ada hin pondo an nasabi nga kalsada dida han 2004-2016 agud magkamay-ada hin farm to market road an mao nga lugar.

Pero mahitungod nga under unclassified status ini nga kalsada tikang 2004-2016 in waray kaaalutaga-e hin pondo han national government an paghingayad hini agud mas mapahilapad, maespalto ngan ma mentinar an mao nga kalsada nga diri la pan-farm to market road.

An Samar Pacific Coastal Road o SPCR project 1 in gin tawag kumo SIMORA- PALAPAG ROAD nga may kahilabaon nga 20.22 km road tikang ha mga bungto han Laoang ngan Palapag han Northern Samar. Kun diin, an kabugosan nga kahilab-on han SPCR project 1 in may kahilab-on nga 11.6 km ngan may 6.17 km road nga tikang naman han provincial road.

Sumala kan Provincial Engineering Office Construction & Maintenance Division Chief, Engr. Jennifer Evangelista, an presente nga kadakmol han nasabi nga kalsada tikang 2004 ngada ha 2016 in 150 millimeter o 15 cm la kun diin, diri ini sakto ha sugad nga klase hin kalsada nga kada oras gin aagian hiton mabubug-at nga mga sarakyan nga nagreresulta han pagkakamay-ada hin gipak han kalsada.

Dugang pa ni Evangelista, agud nga ma-upgrade an mao nga kalsada in nag alutaga an lokal nga panggobyernohan han Palapag hin P3M tikang ha local fund ha kaluyo han limitado nga pondo hini.

Gin pa hitas-an hin 10 inches an PCCP han mao nga kalsada agud maibanan an kakuri han agian, ngan ma akomodar an mga heavy equipment ngan mga bus nga naagi ha mao nga area.

Ha lain nga bahin, nag sumite an opisina han Provincial Engineering Office hin P271M nga project proposal nga diri kaupod han SPCR project 1 budget ha national government agud matagan naman hin pondo an rehabilistasyon han mga kalsada tikang Palapag – Rombang Road – Lanobi Bridge.

Sumala pa kan Evangelista, nag himo gihapon an opisina han Provincial Engineering Office hin program of works dida han tuig-2023 ngan igin sumite ha Office of Civil Defense nga nagkakantidad hin P19.5M para ha mga kalsada han Palapag- Magsaysay- Mabaras ngan P20.5M naman para han rehabilitasyon han Palapag-Simora road pero ha pagkayana in diri la gihapon na aaprobahan an funding hini nga kalsada mahitungod nga nagpapabilin la gihapon ini nga unclassified road.

Nagtutuo naman an probinsya han Northern Samar nga an mao nga kalsada in importante ha kadam-an ngan angay la nga magkamay-ada hin pondo tikang ha nasyonal nga pangobyernohan agud mas mapadali an pag access ha hospital, pag eskwela, pagdedeliver hiton mga produkto ha iba nga lugar sugad man pag access hiton mga mulupyo ha iba pa nga serbisyo hiton gobyerno. (via Bombo Niña Magpili)

SA IBA PANG MGA BALITAMULA SA MAY-AKDA