Gin kumpirma han syudad han Manila an tulo nga bag-o nga kaso han COVID-19 subay ha pinakaurhi nga datos han ira Water and Food-Borne Diseases, Influenza-Like Illnesses, Leptospirosis, ngan Dengue (W.I.L.D.) monitoring.
Mahitungod hini, umabot na ha 60 an kabug-usan nga kumpirmado nga kaso han COVID-19 nga nahipatik ha syudad tikang han Enero 1 kutob ha presente nga bulan.
Labot ha COVID-19, nakaghipatik gihapon an city government hin tulo nga bag-o nga kaso hin dengue, rason agud sumala ini ha 1,961 nga kabug-usan nga ihap han mga kaso han nasabi nga sakit ha Manila yana nga tuig.
Samtang, waray naman nahipatik nga bag-o nga kaso han iba pa nga W.I.L.D. diseases nga iginpailarom ha kada-adlaw nga monitoring han syudad.
Sugadman, nagpapabilin an kabug-usan nga ihap han mga kaso han influenza-like illnesses (ILI) ha 773, severe acute respiratory infections (SARI) ha 240, typhoid fever ha 57, ngan tulo ha cholera.
Kasumpay hini, utro nga ginpahimatngunan han Manila Health Department (MHD) an publiko nga padayon nga maghirot kontra ha W.I.L.D. diseases, labi na yana nga panahon han tag-uran.
