Nanawagan hi Senador Raffy Tulfo ha Department of Human Settlements and Urban Development (DHSUD) nga dayun kanselahon an certificate of registration ngan licenses to sell han mga delinquent developers nga napakyas magtindog hin maupay nga pabahay para ha mga mamaralit, labi na ha mga Overseas Filipino Workers (OFWs).
Ha pagdungog han Senate Committee on Housing and Resettlement dida han Martes, ginbatikos han senador an mahinay nga pag-aksyon han ahensya ha mga reklamo han mga napalit hin real estate ngan an dire pagpapatuman ha mga desisyon han Korte Suprema.
Igin rason ni DHSUD Supervising Senior Usec. Sharon Faith Paquiz nga an Human Settlements Adjudication Commission (HSAC) an mayda pangunahon nga mandato ha pagresolba han mga kaso.
Gin amin gihapon han ahensya nga waray hira hurisdiksyon ha mga developers ugsa an aplikasyon han lisensya, ngan an sheriff la han HSAC an mayda kapas nga magpatuman hin writs of execution para ha refunds.
Mahitungod hini, ginmanduhan ni Tulfo an DHSUD nga magtukod hin proaktibo nga sistema agud imbestigahan an kapasidad han mga developers ugsa pa man matagan hin lisensya, agud maproteheran an ginkurian nga salapi han mga Pilipino.
