Nagpagawas hin pag tarhog hi US President Donald Trump kontra ha Iran kun diin, gin tagan hini an Tehran hin duha ka adlaw nga ultimatum agud utro nga abrehan an Strait of Hormuz o kun diri in pupulbuson hitun Amerika an mga planta han kuryente ha mao nga nasud.
Ha usa nga post ni Trump ha Truth Social, igin malatumat hini nga gugubaon han mga militar han Amerika an mga power grid han Iran, tikang ha pinaka-dako ngada ha pinaka-guti kun diri la gihap tutugutan an pag-agi han mga barko ha sakob hin 48 ka oras.
An mao nga tension in nagtikang han nagpagawas hin de facto blockade an Iran ha mao nga ruta kun diin igin aagi an 20 porsyento han lana ha bug-os nga kalibutan nga nagin rason kun kay ano umabot ha subra $100 an presyo han lana kada bariles.
Kumo bulos, nag hatag hin pagtarhog an mga militar han Iran nga tatargeton gihapon han mga ini an energy ngan desalination infrastructure han Amerika ha mao nga rehiyon kun ig papadayon ni Trump an iya pag tarhog.
Ha kaluyo han paghitaas han presyo han krudo ngan papliton, gin tamay ni Trump an estratehiko nga importansya han Strait of Hormuz ha US.
Sumala hini, an hitaas nga presyo hin lana in “gutiay nga sakripisyo” para ha seguridad han kalibutan.
Samtang, ha ika tulo ka semana han gyera nga gin tikangan han US at Israel, umabot na ha subra 1,500 an na awat an kinabuhi ha kampo han Iran samtang 13 naman ha mga Amerikano nga sundalo.
