NATIONAL – Ginbaribaan han San Juan Regional Trial Court (RTC) Branch 160 an hangyo ni Senator Jinggoy Estrada nga temporary restraining order kontra kan anay DPWH Bulacan first district assistant engineer Brice Hernadez.
Nauna na manggud nga nagsalawad an Senador hin kaso nga sibil para ha danyos kalakip an hangyo nga TRO ngan injunction kontra kan Hernandez agud mapugngan ine nga maghimo hin mga alegasyon kontra ha senador.
An kaso in may paghisumpay ha akusasyon ni Hernandez ha senador nga nakakarawat daw hin kickbacks tikang ha maanomaliya nga flood control projects.
Pero ginmalatumat ni RTC Presiding Judge Aicitel Lascano-Nethercott ha resolusyon nga waray otoridad an korte nga pagbawalan an legislative committee tikang ha pagmandato ha usa nga indibidwal nga umatubang ngan tumestigos ha inquiries.
Pag-eksplikar pa han huwes, gin iisyu la an TRO kun an nasabi nga istoryahon in mayda “extreme urgency”.
Samtang, gin klaro naman han parte han Senador nga an TRO la an ginbaribaran han korte pero nagpapabilin nga nakabinbin an aplikasyon para ha Writ of Preliminary Injunction ngan nakatalaan nga pagdunggon ha Nobyembre 12 kun diin tatagan an magkaluyo nga kampo hin higayon nga magpresenta an ira mga argumento ngan ebidensya.
