Maduon nga igindiwara ni anay Senador Antonio “Sonny” Trillanes IV an pahayag ni Davao Rep. Paolo “Pulong” Duterte nga mayda na ginpagawas nga arrest warrant an International Criminal Court.
Sumala kan Trillanes, waray pa iginpapagawas nga warrant kontra ha hin-o man ngan nagpapabilin nga hurob-hurob la an nasabi nga impormasyon.
Ginmalatumat ni Pulong Duterte nga mayda hiya “highly reliable source” nga nagpahayag nga mayda na warrant kontra ha pira nga personalidad, kalakip hi Senador Christopher “Bong” Go.
Dayun naman ini nga ginpanhimuwa ni Trillanes ngan han mga ahensya han gobyerno, kaupod an Department of the Interior and Local Government (DILG) ngan Philippine National Police (PNP), nga nagpahayag nga waray pa hira nakakarawat nga anuman nga opisyal nga komunikasyon tikang ha ICC.
Subay ha pinakaurhi nga report han ICC, padayon la gihapon an imbestigasyon kasumpay han war on drugs dida han adminstrasyon ni anay Presidente Rodrigo Duterte, pero waray pa ginpapagawas nga arrest warrant.
Ha datos han Human Rights Watch, ginbabana-bana nga sobra 6,000 kataw3o an napatay ha mga operasyon kontra-droga tikang han 2016 kutob 2022, rason agud magin sentro han imbestigasyon han ICC an Pilipinas.
Nagdig-on hi Trillanes nga kinahanglan magpabilin nga subay ha opisyal nga datos ngan komunikasyon tikang ha ICC agud malikayan an sayop nga impormasyon nga posible magdurot hin pagkalipong ha publiko.
Dugang pa hini, an anuman nga pitad han ICC in maagi ha sakto nga proseso ngan dire angay pangunahan hin hurob-hurob.
