LEYTE – Naghuman na an gindumara nga tulo kaadlaw nga Youth Development Training Program han Leyte Provincial Population Office.
Ginhisgutan han nasabi nga aktibidad an nakaka-alarma ngan an nahihinitaas nga ihap han mga kabataan nga nag-aagi hin mental health issues.
Usa an nasabi nga aktibidad ha mga prayoridad nga programa han probinsya, kun diin panuyo hine nga matagan hin sakto nga hibaro an mga kabataan kun patiunan-o aatubangon an problema ha sosyedad.
Sumala kan Province of Leyte Youth Development Officer Designate, Rodel Catapal, mahitungod ha makababaraka nga ihap kaparte han mga suicidal issues ha kabataan han nakalabay nga tuig an rason han ira pagdumara han nasabi nga aktbidad.
Sumala naman kan STI University President, Author and Master of Arts in Clinical Psychology, Amelia “Lolakwentosera” Pagdanganan, an mental health disorder in usa nga emosyon nga na-out of order na kun diin, damo nga mga persona an pwede mahimo rason nga dire la ine basta-basta nga sakit, kundi naka-specific ha kun patiunan-o ginpo-proseso han utak an mabug-at nga panhitabo han usa nga indibidwal.
Dugang pa hine, an depresyon in dire la mahitungod han loneliness o pag-uusaan, kundi mahitungod han kasinahon nga gin-aabat han indibidwal ha usa nga butang o sitwasyon.
Samtang, labot la han mental health awareness in gin hingadayan gihapon an kaparte han cybercrime prevention, drug awareness, ngan SOGIE. (via Bombo Niña Magpili)
