NATIONAL – Gindayaw han opisyal han Catholic Bishop’s Conference of the Philippines an pitad han Bangko Sentral ng Pilipinas nga igbulag an e-wallets tikang ha online gambling sites ha sakob han 48 hours.
Sumala kan CBCP Pres. Pablo Virgilio Cardinal David, bisan man maupay nga katikangan ini in dire la gihapon sakto an simple nga regulasyon.
Kasumpay hini, utro hira nga nanawagan hin total ban ha online gambling labi na nga klaro naman ha balaud nga bawal an mga slot machines ngan huygo ha mga lugar nga abri ha publiko labot na la ha mga accredited nga hotel ngan resort.
Pero yana nga mga panahon sumala kan Cardinal David, aada na ha cellphone an huygo sanglit bisan hin-o, bisan diin, bata o lagas in madagmit maka-access, ngan waray bantay ngan waray limitasyon.
Dako na mangud an epekto hini ha pamilya, kabataan, ngan ha mga nagkukuri nga tawo nga lunod ha utang, adiksyon, ngan kawaray pag-laum bisan bilyon-bilyon pa an halin han gobyerno tikang hini.
