VILLABA, LEYTE – Arestado han mga operatiba han Villaba Municipal Police Station an Top 1 Regional Most Wanted for Murder ha gindumara nga operasyon.
Ginkilala an suspek kan alyas Gboy, 48-anyos an pangidaron, ngan residente han Brgy. Cagnocot, Villaba, Leyte.
Sumala kan Villaba Municipal Police Station Chief of Police, PMaj Ian Salvador Po, naaresto an suspek pinaagi han bisa han Warrant of Arrest para ha kaso nga Murder nga gin isyu han Presiding Judge han 8th Judicial Region, Branch 17, Palompon, Leyte.
Waray naman pyansa nga gin rekomenda ha nasabi nga kaso.
Durante han pag-aresto, gin pahibaro an akusado han iya mga katungod ha lenggwahe nga iya naiintindihan.
Ha pagkayana in ada na ine ha kustodiya han Villaba Municipal Police Station para han kaangayan nga dokumentasyon.
An akusado in an pangunahon nga suspek ha pamusil nga nahitabo dida han nakalabay nga Mayo 28, 2025 kun diin an biktima in usa nga incumbent nga Brgy. Kagawad.
