Iginduon ni Police Staff Sergeant Arla Ray Paciencia, tiya han pulis ni alyas “Nash”, usa ha mga menor-de-edad nga suspek ha school shooting incident dinhi ha Tacloban City dida han Hunyo 22, 2026, nga ilegal nga nakasulod ha iya balay an iya umangkon ngan ginkuha an iya pusil.
Manunumduman nga gumawas ha imbestigasyon nga gingamit an nasabi nga pusil ha shooting incident ha San Jose National High School, nga iginkamatay han tulo nga estudyante.
Ha pag-atender hini ha hearing han Senate Committee on Women, Children, Family Relations and Gender Equality dida han Miyerkules, Hulyo 1, ginduon han pulis nga pirit nga ginsulod han iya umangkon an iya balay ugsa mahitabo an insidente.
Sumala kan Paciencia, pirit nga ginabrihan ni Nash an nakasarado nga plastic locker kun diin nakabutang an pusil ha sakob han gun box.
Ginamin gihapon han pulis nga dire sulod ha standard an safety vault nga gingamit niya nga taguan han pusil, ngan huna hini nga sakto na an security hini mahitungod nga hiya la an nakaukoy ha iya balay.
Presente naman nga aada ha kustodiya han mga otoridad hira alyas “Rod” ngan “Nash” samtang ginhuhulat an ira pagbalhin ha social welfare and development facility, kun diin hira in igpapailarum ha intervention ngan rehabilitation program.
