TACLOBAN CITY – Ginkansela han lokal nga pangobyernuhan han Carigara, Leyte an tinuig nga Turopo Festival nga gindudumara kada Sabado de Gloria ha nasabi nga bungto.
An Turogpo in usa nga termino nga Waray nga karuyag sidngon in matchmaking o fighting. Kaupod ha mga aktibidad an labanan han mga karabaw, kabayo ngan manok.
Sumala kan Atty. Wenceslao Narido Jr., an Municipal Administrator han Carigara, Leyte, gindadayo han mga turista tikang ha iba-iba nga lugar an ira Turogpo Festival pero nagdesisyon la anay an ira lokal nga pangobyernuhan nga igkansela la anay ine yana nga tuig para han kapakanan han mga hayop.
Bisan paman daw kun karuyag nira nga igpadayun an nasabi nga tradisyun kada Semana Santa tikang pa han 1600s, an kanselasyon hine in para daw dire hira makatalapas ha Animal Welfare Act of 1998.
Kabalyo naman ha nasabi nga festival an pagbubuhaton nga simple nga pagdumara han misa ngan halipot nga programa ha maabot nga Sabado de Gloria ha Abril 8.
Posible naman daw nga ha masunod nga mga tuig in magdumara hira hin alternative event sugad nala han carabao o di man ngani horse racing event.
