Nagpaabot hin pakikisubo an TINGOG Party-list ha mga pamilya han mga istudyante nga namatay ngan nasamaran ha pamusil nga nahitabo ha San Jose National High School ha Tacloban City.
Subay ha grupo, nakikigsumpayan na hira ha mga ospital, lokal nga pangobyernuhan, Department of Education, ngan iba pa nga ahensya gud masigurado nga matatagan hin kinahanglan nga pagtambal, ngan bulig-medikal an mga samaran nga istudyante.
Mag-aalutaga gihapon hira hin psychosocial ngan mental health support para ha mga pamilya han mga biktima, mga istudynate, magturutdo, ngan iba pa nga apektado han insidente.
Nanawagan an TINGOG Party-list hin malaksi, mahugot, ngan patas nga imbestigasyon agud matudlok kun patiunan-o nahitabo an insidente ngan kun patiunan-o nakasulod an mga pusil ha sulod han iskuylahan.
Suportado gihapon han grupo an pagpapadig-on han mga pitad para ha katalwasan ha mga iskuylahan, kaupod an mas mahugot nga seguridad ngan mas harani nga koordinasyon han mga iskuylahan, kag-anak, barangay, pulisya, ngan iba pa nga sektor.
Iginduon han TINGOG Party-list nga padayon hira nga makikiusa ha kumunidad han San Jose National High School ngan ha mga residente han Tacloban samtang gindudumara an pagpa-upay ngan pagbakdaw tikang ha trahedya.
