TACLOBAN CITY – Nahipatik an tigda nga pagdamo han kaso han acute water diarrhea ha syudad han Tacloban.
Sumala kan Dr. Danilo Ecarma, Head han Tacloban City Health Office, nagkamay-ada hin tigda la nga pagdamo hin kaso han gintatawag nga acute watery diarrhea.
Basar han ginbuhat nga census in nakaghipatik ine hin 32 kabug-os nga pasyente nga nahi-admit ha duha nga magka-lain nga hospital; 22 ha Eastern Visayas Medical Center ngan 10 ha Tacloban City Hospital.
Tikang naman ha mga barangay han 105, 106, 107, 91 Abucay, 39 Calvary Hill, ngan 79 Marasbaras.
Nahireport gihapon an pagkamatay han duha katawo kun an usa hine in usa nga 10-months old nga baby tikang ha 91 Abucay samtang an usa naman iin waray pa kakumpirma kun diin nagtikang.
An tinikangan daw han tubig ha mga northern barangay in gindeliver la tikang ha mga retailer han water refilling station.
Dugang pa han mao nga opisyal, ira na ginpapanginano an kun anu an nagin source han impeksyon pero nagtotoo ine nga daw tikang ine ha tubig.
Gin-examine na an nasabi nga tubig ngan ginlalauman nga mababaruan an resulta hine yana nga adlaw.
