TACLOBAN CITY – Dako, an posible nga magin epekto han tiarabot nga price increase ha dire la ha rehiyon, kundi ha bug-os nga nasud mahitungod han nagpapadayon nga away han US-Israel ngan Iran.
Sumala kan Johnson Ang hiton Johnline Movers, makuri para ha ira nga mga negosyante an price increase mahitungod nga dako an epekto hini.
Naghihingyap naman ini nga ha oras nga igpatuman na ini nga umento in dire tigdaon an pagtuman kundi igpahinay-hinay agud dire gihapon matigdaan an iba pa nga apektado.
Dugang pa ni Ang, dire la an produkto nga lana an maaapektaran han pag-hitaas han presyo kundi haros ngatanan nga produkto mahitungod nga magkakamay-ada ini hin ‘chain reaction’ labi na ha mga produkto nga magamit hin gasolina o lana.
Sumala pa kan Ang, an ira nala magigin medyos hini in an pag-iban la anay hin units han truck nga mabiyahe agud dire gud sugad nga magin dako an kagarastuhan.
Ha katapusan, ginmalatumat hini nga dire la hira nga mga negosyante an magigin apektado an pagkiwa han presyo kundi ngatanan nga molopyo.
