TACLOBAN CITY– Ginkokondinar han Tacloban City Police Office, an usa nga viral post, kasumpay ha pulis nga nakuhaan hin video nga ginhuhuwaran an duha nga kabataan hin rugby ha may Avenida Veteranos syudad han Tacloban.
Sumala kan PLtCol Allan Camasin, City Affairs & Development Unit, Tacloban City Police Office, dire nira gintotolerate an sugad nga panhitabo ngan gios han ira mga tinaglawas partikular na kun an mga ine in nakakatalapas ha balaod.
Dugang pa ni Camasin, ha pagkayana nagdudumara na hira hin imbestigasyon kasumpay han nasabi nga panhitabo, agud nga matukib an ira han-ay ha tinuod nga nahitabo.
Ginmalatumat pa han nasabi nga opisyal, nga an TCPO in dire na-abuyon ha mga sugad hine nga binuhatan, matungod nga an kapulisan an dapat nagpapakita hin ehemplo ha pagigin maupay nga susbaranan han publiko, lakip na an paghatag hin respeto ha ira nadadakpan nga mga nakakatalapas ha balaod.
Ginpatapod ni Camasin, nga magigin patas an ira gindudumara nga imbestigasyon.
