TACLOBAN CITY – Padayun nga ginbeberipika han Kapulisan ha Tacloban ha mga nagkakagawas nga report bahin han presensya han Muslim nga nagpakasakay ha Toyota ngan naka-convoy.
Man ngani nagsasarang an mga Text Message ha siyudad bahin han pagpapaikmat ha mga katawhan han daw posible nga presensya han Terorista nga grupo.
Pero pagklaro ni PSSUPT Rolando Bade, Hepe han Tacloban City Police Office (TCPO) nga dapat diri anay nga magtahap basta basta an mga katawhan hilabi pa nga mayda talaga presensya han mga Muslim ha siyudad nga mayda maupay an panuyuan.
Sumala pa hini nga bangin an nakit-an nga nakaconvoy nga sarakyan in amo an mga Guest nga Turkish ngan iba pa nga mga langyawanun hilabi pa nga nagkamay-ada hin pormal nga opening han Mosque ha Anibong kakulop nga adlaw.
Basar naman ha nakuha nga impormasyon han Bombo Radyo Tacloban nga presente han mao nga aktibidad an Commissioner han National Commission on Muslim Filipino nga hi Flores Malayang.
