TACLOBAN CITY – Nakiki-usa an Tacloban City Hospital ha pagselebrar han World Tuberculosis Day ha pamamaagi han magkadurudilain nga aktibidad nga may panuyuan atuhan ngan pugngan an tubercolosis ngan pakusgon an kaadman han publiko kasumpay ha sakit.
Ini nga aktibidades in kaparte han mas ginpahugot pa nga kampanya han bug-os nga kalibutan kontra tubercolosis ngan agud mas mapadagmit pa an pagtudlok ngan pagtambal hini nga sakit.
Sumala kan Tacloban City Hospital Chief Dra. Gloria Fabrigas, nga usa ha panuyuan gihapon hini nga event in agud dire ig-stigmatize o i-discriminate an mga tawo nga mayda sakit nga tuberculosis, mahitungod nga ini in usa ha mga rason nga naawod o nahadlok magpacheck-up o magpatambal an mga indibidwal nga nakakaabat o mayda simtomas han sakit.
Dugang hini nga naghahatag gihapon an ospital hin libre nga TB screening para ha publiko kumo kaparte han selebrasyon kun diin, panuyuan hini in aghaton an molupyo nga magpacheck-up agud mapugngan an sakit ngan malikayan an pag-sarang hini.
Ginkakalakipan dinhi an libre nga konsultasyon, chest x-ray, TB testing ngan HIV counseling/testing, ngan pandestribwer han mga kinahanglan nga mga tambal kontra TB.
An pagselebrar han World Tuberculosis Day in nagsisirbe nga pahinumdum nga an pag-ato kontra TB in responsibilidad han bug-os nga komunidad. Ha pamamaagi han dudrungan nga pagkiwa han gobyerno, health workers ngan publiko, in makakab-ot an TB-free nga komunidad.
