Gin sirotan na han korte hin 15 katuig nga pagkakapreso an tatay han usa nga teenager nga responsable ha mass shooting ha usa nga high school ha Georgia, U.S.A dida han 2024 nga iginkamatay han upat katawo.
Hi Colin Gray, 55 anyos, in nasirotan nga guilty mahuman mapamatud-an nga nagpabaya ini ngan ginhatag ha iya anak nga hi Colt Gray an pusil nga ginamit ha insidente.
Syahan nga gin sentensyahan hi Colt Gray, nga yana in 16-anyos, hin lifetime imprisonment nga waray posibilidad nga parole mahitungod ha pamusil ha iskuylahan.
Sumala kan Judge Nicholas Primm, bisan man kun dire masusukol an sakit nga igindurot han trahesya ha mga biktima ngan ira pamilya, kinahanglan pa gihapon igbulag an pagbaton han tatay ha mismo krimen nga ginbuhat han ira anak.
Mababaruan nga iginkokonsidera nga pinakasyahan ha Georgia nga ginsirotan han second-degree murder an usa nga kag-anak mahitungod ha mass shooting nga ginbuhat han ira anak.
Sumala ha mga prosecutor, mayda mga tigaman nga mayda bayolente nga batasan an bata ugsa paman an pamusil, pero waray ini katagi hin sakto nga aksyon han iya mga kag-anak, lugod in baga-baga hin ginkokonsiente pa an pagigin bayolente han ira anak.
Padayon naman nga ginagamit han mga prosecutor ha Estados Unidos an sugad nga legal nga pitad agud papagbatunon an mga kag-anak nga gintotoohan nagpabaya ha pagpapadako ha ira mga anak labi na ha pag-handle han mga pusil, kumo kaparte han pagpuypoy ha nagtitikaduro nga school shooting incident ha nasud.
