TACLOBAN CITY – Gin koronahan kumo Miss Universe Philippines-Tacloban an usa nga maestra ngan nanay nga hi Angela Norwillen Cabel-Quiloña mahuman nga pirdehon an 11 nga kandidata han Miss Universe-Philippines Tacloban 2025 nga gindumara dida han Sabado, Pebrero 1 ha Tacloban City Convention Center (Astrodome).
Labot han korona in nadukdok gihapon ni Cabel an tulo nga special awards sugad han Best in Swimwear, Best in Evening Gown, ngan Best in Modern Filipiniana.
Gin koronahan naman kumo 1st Runner- Up hi Kisha Honey Panis; 2nd Runner Up hi Marivic Silva; 3rd Runner Up hi JeneMae Mabuti; ngan 4th Runner Up naman hi Carryle Nicole Colminas.
Hi Cabel in tikang ha Oras, Eastern Samar ngan anay Binibining Silangan Turismo 2021 ha Borongan City.
Ha Q and A portion, gin pakianhan hi Cabel kun patiunan-o hine maaghat an mga katawhan nga bilngon an kaupayan ha usa nga sosyedad kun diin mas madagmit magsarang an mga negatibo kumpara ha positibo.
Ha iya baton in gintagan-duon hine an iya mga eksperyensya kumo usa nga nanay ngan magturutdo kun diin ginpapakita hine an iya malasakit pinaagi han pag-atiman han iya mga istudyante, sugadman han iya anak nga lalaki.
Nakakarawat naman ine P100,000 cash prize; ngan ine an magre-representa ha syudad han Tacloban ha Miss Universe Philippines 2025.
Ha lain nga bahin, ha final walk ni Miss Universe Philippines-Tacloban 2024 Tamara Ocier, gin pasalamatan hine an ngatanan nga bumulig ha iya tikang han iya pagtikang ngada han mai-representa hine an syudad han Tacloban ha Miss Universe Philippines 2024.
Hi Tamara an pinakasyahan nga kandidata nga igin padara han organisasyon ha nasyunal nga paisan-isan kun diin nagin semi-finalist ine ha Miss Universe Philippines 2024. (via Bombo Shiela Encio)
