TACLOBAN CITY – Nanawagan an pira nga mga fuel stations o gasoline independent players ha Leyte ha mga konsumidor nga magtipid ha paggamit han gasolina o produkto nga petrolyo yana nga padayon an paghinitaas han presyo hini.
Una hini, ginlalauman nga ha masunod nga mga semana in posible nga umabot ha P12 an umento han oil prices ha nasud tungod han epekto han nagpapadayon nga giyera ha butnga han Russia ngan Ukraine.
Sumala kan Wilson Uy, President and CEO han Nitrofuel Corporation, dire mapupugngan an mao nga pag umento han oil prices tungod nga nakabase an aton nasud ha presyo han world market.
Tungod hini, in nanawagan hi Uy ha mga konsumidor nga magtipid han paggamit han gasolina pinaagi han paggamit han ira mga sarakyan o behikulo nga pagplanuhan an ira mga lakat ngan dire maging malako ha paggamit hin gasolina.
Naglalaum naman hi Uy nga pag-iistudyuhan hin maupay han gobyerno kun ano an angay nga solusyon ha mao nga himangrawon.
