TACLOBAN CITY– Gin-aaghat hiton lokal nga pamunuan han Tacloban adton mga kabatan-unan nga maki-usa ha mga aktibidadis nga iglalatag han syudad yana nga tidaraon nga kapaskuhan.
Sumala kan Tacloban City Youth Coordinator, Felgin Silagan, nakalatag na an pira nga mga aktibidadis han
Tacloban City Youth Development Office.
Dugang pa hine, magkaduru-dilain nga mga aktibidadis an ira ginbug-os agud nga maipakita han mga kabatan-unan an ira mga gintatago nga talento.
Panuyo hine, mahirayo an mga kabataan ha dire maupay nga mga gawi-sugad hiton pag-gamit hin ilegal nga droga ngan damo pa nga iba.
Ha lain nga bahin, adi naman an mga masunod nga gin-andam han lokal nga pangobyernohan para ha mga kabatan-unan: Parol Making Contest – pagdudumaraon ine ha City Hall Grounds yana nga Disyembre 6, Paskorale ha Robinsons North yana nga Disyembre 7, Saragyaw 2024 Christmas Edition, ha Robinsons North yana nga Disyembre 15, 2024.
Gintagan duon ni Silagan, nga an tanan in mayda kabalyu nga premyo, para han mga magdadaog kun diin an pinaka hitaas nga makukuha han mga ine in ada ha P30K, ngan an pinaka hamubo in P5,000.
