TACLOBAN CITY – Nanawagan hi City Health Officer Dr. Jaime Opinion ha LGBTQIA+ community nga magpa-HIV test kumo kaparte han mas pinakusog nga kampanya han pag-kontra han HIV labi na ha mga kabataan ngan estudyante han high school.
Ginpahayag ni Dr. Opinion nga padayon iton pakikipagsumpayan han City Health Office ha Department of Education agud nga mga mapahaluag pa iton sakop han adbokasiya, ngan mas mapahilarom pa an kinaadman han mga kabataan maypaghisumpay ha HIV, ngan an mga pamaagi agud malikayan ini.
Kaparte han programa an libre nga voluntary HIV testing nga ginbubuhat ha kada District Health Center, kun diin pwede magpa-check an publiko.
Kun pananglitan nga ma-diagnose, tatagan naman hin giya ngan ig mo-monitor han Department of Health an indibidwal agud matikangan an pagtambal.
Ginklaro gihapon ni Dr. Opinion nga dire ha mismo nga HIV-AIDS namamatay an usa nga tawo, kundi mahitungod ha mga komplikasyon nga durot hini sugad han tuberculosis, respiratory failure, ngan heart disease—nga resulta han maluya nga immune system.
Kaupod gihapon ha mga pangunahon nga estratehiya han siyudad an pakikipag-binuligay ha mga barangay officials, health centers, ngan mga organisasyon han LGBTQ h pagbubuhat han HIV testing ngan information dissemination.
Ginpahibaro naman hini nga abre an mga health center ha magkaduro-dilain nga parte han Tacloban sugad han San Jose, V&G, Sagkahan, Abucay, Diit, ngan North San Jose.
Nanawagan gihapon an nasabi nga doktor hin mas halawig nga pag-intindi, edukasyon, ngan partisipasyon han publiko ha pagtugon han nagtitika-‘grabe’ nga isyu han HIV ha siyudad. (via Bombo Shiela Encio)
