TACLOBAN CITY – Kumo kaparte han ika-118 nga Founding Anniversary han Eastern Visayas State University, in nagdudumara an nasabi nga institusyon hin “Tabo ha EVSU 2025”.
Kun diin, pira nga mga lokal nga organisasyon ngan kooperatiba an nagbabaligya hin magkaduru-dilain nga mga paninda sugad han souvenirs, mga tanom, karan-on, tsinelas ngan sandals, accessories ngan damo pa.
Sumala kan Eastern Visayas State University Extension Services Director, Rustom Clemente, pwede sumulod ngan welcome gihapon an mga outsiders nga pumalit han mga paninda ngan sugadman ig enjoy an aktibidad basta mayda la han mga ine visitors ID.
Maupay daw gihapon an halin han mga nagbabaligya tikang han mag-abri han nasabi nga aktibidad mahitungod nga dire la mga istudyante an pwede makapalit, kundi hasta gihapon an mga outsiders o tikang ha gawas sugad han mga pedicab drivers ngan iba pa nga tikang ha gawas.
Gin abrihan gudman an “Tabo ha EVSU 2025” dida han Pebrero 17, ngan nakatalaan nga maghuman ha Biyernes, Pebrero 21.
Gin-aaghat naman ni Clemente iton publiko nga bumisita ha EVSU ngan tangkilikon iton pipira nga mga paninda nga iginbabaligya.
(Via Bombo Shiela Encio)
