TACLOBAN CITY – Nakadepende la ha mga gindadara nga suplay hiton mga traders an nagigin suplay han sibuyas ha Sinirangan Bisayas.
Sumala kan Brenda Pepito, Chief Agri-Business and Marketing Assistance Division han Department of Agriculture Regional Office 8, nakadepende an suplay han sibuyas ha mga gindadara hadton mga traders nga natikang ha Luzon ngan ginbabaligya liwat ha mga manmaralit ha Eastern Visayas.
Samtang, mayda naman pira nga mga syudad an padayun nga ginmomonitor adton pamresyuhan han sibuyas, amu an Catarman, Catbalogan City, Borongan City, Tacloban City, Ormoc City, Maasin City, ngan Naval, Biliran.
Kada naman daw lugar nga ira ginmomonitor in mayda na magkaduru-dilain nga pamresyuhan hiton sibuyas.
Dugang pa hine, kada daw katapusan nga quarter hiton tuig in naghihitaas an presyo hiton sibuyas hasta nga nabalik nala ine ha orihinal niya nga presyo.
Padayun naman an gindudumara nga monitoring hiton ira buhatan ha mga presyo hiton sibuyas.
