Agud dire maparalisa an produskyon han asukar ha nasud, nagios na an Department of Agriculture (DA) ngan Sugar Regulatory Administration (SRA) agud proteheran an mga parag-uma kontra ha nakaamba nga kakulangan ngan paghitaas han presyo han lana ngan abono resulta han padayon nga kasamok ha Middle East.
Pormal na nga nakipagsumpayan an DA ngan SRA ha magkadiru-dilain nga sangay han gobyerno, partikular ha Department of Energy (DOE), agud siguraduhon an madig-on nga suplay han petrolyo ngan abono.
Subay ha DA, kritikal ini nga panahon mahitungod nga ada ha kakusgan han harvest cycle, kun diin pinakahitaas an demand han lana.
Gin gagamit ini ha dudrungon nga pag-harvest, pagbiyahe han tubo tikadto ha mga sugar mills, ngan ha pag-aandam han tuna nga tatanuman para ha masunod nga crop cycle.
Gin kumpirma ni SRA Administrator Pablo Luis Azcona nga igindaop nira kan Agriculture Secretary Francisco Tiu Laurel Jr. an sitwasyon agud pormal nga maipaabot ha DOE an pagkabaraka han bug-os nga sugar industry.
May dako gudman nga epekto ha world market an kasamok ha Middle East, nga amu an pangunahon nga nagdidikta han presyo ngan supay han lana nga direkta naka-angkla ha mga pangunahon nga farm inputs.
Gin sigurado naman ni Laurel nga nakaandam an gobyerno nga umalalay ngan dire tutugutan nga madelatar an operasyon han sektor.
Dugang pa han sekretarya, dire la an mga producer han asukar an ira poproteheran, kundi magin an pankabug-usan nga suplay han lana ngan abono para ha ngatanan han mga parag-uma ngan paru-pangisda ha bug-os nga nasud.
