METRO MANILA – Ginsigurado han Department of Energy nga supresyente an suplay han lana ha nasud ngan waray ini plano nga mag-order hin kadugangan nga fuel ha pagkayana, ha kaluyo han ginpatuman nga panibag-o nga paghitaas han presyo han mga produkto han petrolyo dida han Martes, Mayo 5.
Sumala kan Energy Sec. Sharon Garin, dire na kinahanglan an panibag-o nga order han fuel mahitungod nga may supresyente nga suplay ngan limitado gihapon an storage facilites han nasud. Aada ha 150 milyon litro na han diesel an naiproseso ngan gingagamit kumo buffer.
Basar ha datos han DOE, may sakto nga suplay an nasud para ha 53.71 ka-adlaw. Kaupod dinhi an gasolina (52.64 ka-adlaw), diesel (54.58 ka-adlaw), kerosene (166.67 ka-adlaw), jet fuel (71.14 ka-adlaw), fuel oil (62.69 ka-adlaw), ngan liquefied petroleum gas o LPG (40.46 ka-adlaw).
Labot hini, ginbabana-bana nga mahitaas gihapon an presyo han liquefied petroleum gas hin P1.33 kada kilo yana nga bulan han Mayo, kaparehas ini hin P13.42 nga dugang ha kada 11-kilogram nga cylinder.
Ha kuryente naman, ginmalatumat ni Garin nga suportado han DOE an balaudnon nga tanggalon an value-added tax ha kuryente agud mapahamubo an gastos han mga konsumidor.
