TACLOBAN CITY – Patay an usa nga staff ha usa nga drug store ha syudad han Baybay mahuman nga aksidente nga mapusil han nakaduty nga security guard hini.
Sumala kan PSupt. Ricky Reli, hepe han Baybay City PNP, nahitabo an mao nga accidental shooting ha mismo sakob han Mercury Drug Store kun diin ginkilala an biktima nga hi Keizen John Narbonita, 21 anyos an pangidaron, self service assistant han mao nga drug store ngan residente han Carigara, Leyte.
Ginkilala naman an nakapusil han biktima nga hi John Degrano Martin, 23 anyos, security guard ngan residente han Brgy. Hilaknitan, Baybay City.
Subay ha inisyal nga imbestigasyon, nagtatanggal an mao nga security guard han iya caliber 38 nga pusil, sumangko an an holster hini ha lingkuran ngan aksidente nga napusil an mao nga biktima.
Nag-angkon hin igo ha dughan an biktima ngan gindalagan pa ini ha ospital pero gindeklara naman ini nga patay han attending doctor.
Ha pagkayana, boluntaryo nama nga sumurender an suspek ngan ginhuhulat pa an pamilya han biktima kun magpapasaka ba ini hin kaso.
Padayon gihapon an imbestigasyon han mao nga insidente ngan pagreview han CCTV nga nagpapamatuod nga aksidente la an nahitabo.
