TACLOBAN CITY – Naghangyo na an local government unit han Sta. Margarita, Samar ha Department of Education (DEPED) nga tugutan hira nga magkaada hin extension ha paggamit han mga eskwelahan kumo quarantine o isolation facilities para ha mga COVID-19 related patients ha ira bungto.
Una hini, nagpalusad hin regional memorandum an DEPED Eastern Visayas nga nagmamando nga an pag-gamit han mga eskwelahan kumo quarantine facilities ha rehiyon in kinahanglan nga tubtob la Agosto 15.
Sumala kan Sta. Margarita Mayor Gemma Zosa, an kada barangay ha ira bungto in mayda quarantine facilities ngan kun magkulang ngan dire maakos han mga ini nga maakomodar an mga mangunguli nga LSI in may gin-alutaga nga mga eskwelahan para han mga ini.
Tungod nga modular learning man an igpapatuman ha pagtitikang han klase yana nga bulan pwede nga magamit la gihapon an mga eskwelahan kumo pasilidad para ha mga COVID-19 related concerns.
Ha pagkayana in maabot na ha 430 nga mga LSI ngan OFWs an nakapanguli ha Sta. Margarita, Samar tikang han pagtikang han implementasyon han programa nga Balik Probinsya ngan Hatid Probinsya.
