TACLOBAN CITY – Nagpatuman na hin pagbabag-o ngan mga pitad an Social Security System (SSS) Tacloban kumo solusyon ngan kabatunan han mga reklamo ha ira han pira nga mga kliyente.
Una hini, damo an nagrereklamo ha SSS Tacloban branch tungod han kahilaba han pila ngan may mga napila alas dos pala hiton umagahon pero dire la gihapon naseserbisyuhan o naaakomodar han mao nga opisina.
Sumala kan Dra. Lilibeth Cajucom, Branch Manager han SSS Tacloban, ha pagkayana in ginrecall na an 50% han ira mga empleyado nga nakawork from home ngan yana in nareport na ha ira opisina tikang han yana nga semana.
Gin aaghat gihapon nira an ira mga kliyente nga mag-online appointment anay pinaagi han My.SSS agud nga sigurado nga maseserbisyuhan ha ira pagkadto ha ira opisina.
50% la gihapon an ira gintutugot nga sumulod haira opisina ha pagkayana tungod nga nakapailarom pa ha alert level 3 status an Tacloban.
Mayda gihapon manual appointment an SSS para han mga kliyente nga dire makakapag schedule ha online.
Ha pagkayana in maabot ha 250 nga mga kliyente an target han SSS Tacloban nga maakomodar o maserbisyuhan ha kada adlaw.
