TACLOBAN CITY – Gino-offer yana han Social Security System ha mga membro hine an SSS Emergency Loan Program.
Nahimugso an nasabi nga programa mahuman an deklarasyon ni Presidente Ferdinand Marcos Jr. han Proclamation No. 1077 dated November 25 o an pag-anunsyo hine an State of National Calamity, kun diin kahuman hine in nagpagawas an SSS hin Circular No. 2025-011 para maghatag hin emergency loan programa ha mga apektado hine.
Sumala kan Social Security System Visayas Central 2 Division Acting Regional Communications Officer, Atty. Jepernick Espadero, an nasabi nga circular no. in an opisyal nga aludayday han nasabi nga loan program kun diin nakasurat an mga kwalipikasyon, sugad han kun hin-o an pwede maka-avail, pira an maa-avail, interes, ngan kun patiunan-o an pag-apply.
Gin malatumat pa hine, nga ngatanan nga membro han SSS—employed, self-employed, voluntary, non-working spouse, ngan kasambahay—in pwede maka-avail han nasabi nga programa.
Maabot naman ha P20,000 an pwede mahuram han kada-membro, pero madepende liwat ine ha monthly salary credit han mahuram. Pananglitan, an monthly salary credit han membro in ada ha P30,000, an mahuhuram la hine in P20,000 mahitungod nga amu an maximum nga pwede mahuram. Pero kun an monthly salary credit in ada la ha P18,000, in P18,000 la liwat an pwede mahuram hine.
Dugang pa hine, pwede gihapon nga less than P20,000 an huramon han mga membro nga kwalipikado ha P20,000 loan, kun dire karuyag han mga ine hin dako nga baraydan.
Ginpahibaro gihapon hine nga tinuig an magigin interes han loan, ngan dire binulan, kun diin ada ha 7% an annual interest.
Agud makahuram, kinahanglan nga may-ada 36 months posted contribution an membro ngan an unom hine in kinahanglan nga posted dida han nakalabay nga 12 kabulan; waray past-due; waray pa final benefit; ngan kinahanglan nga mayda disbursement account nga naka-register ha ira online account nga My.SSS.
Nagtikang naman na an pag-avail han emergency loan program dida pa han nakalabay nga Disyembre 10, 2025 ngan maghuhuman naman ha Disyembre 9, 2026.
